أنا مش عارفة ربنا هيزعل ولا لأ لو سافرت و عشت مع واحد منغير ورقة مختومة من الكنيسة و لما الحياه تاخدني أو تاخده مزعلش و مجريش ورا الورث والنفقة
بس متأكدة إنه هيزعل لو كنت مؤمنة بقدسية أسراره، و أخدت سِر منهم و فشخته و حولته لِـ جِنس مجرد أو حد يطبطب عليا لما أرجع من الشغل تعبانة أو علشان ضِله أحسن من ضِل حيطة و في نفس الوقت ابقى أنا و كل الي حواليا بنقول عليه غبي و تافه و سطحي و إلخ و إني متجوزاه بس علشان الحاجات الي مينفعش يدّوها الأصحاب
أنا مش مؤمنة بالجواز والورق و مش عايزة أعمل حفلة قبل ما أروح أعيش مع حد مريحني .. مش عايزة حد فينا يحتاج لِـ ورقة و خِتم علشان يضمن استمرارية العلاقة اللي بيننا, عايزاه هو يطمنني و أنا أطمنه
مش عايزة حد يفتكر أنه ضمنّي بورقة و خاتم
عايزة أحس إني حرة طول عمري و أنه لو عايزني جمبه لازم يفضل يبزل مجهود في التواصل بيننا علشان العلاقة تستمر
مرعوبة أكون بتاعة حد
ماختارتش أشيل إسم أبويا و عمري ما هاشيل إسم راجل تاني بإيدي
أنا مش مؤمنة إني متوافقة نفسياً و معنوياً مع منظومة الجواز أصلاً
ولا منظومة الخِلفة
و عمري ما عملت حاجة مش مقتنعة بيها
25-4-2013
