قدرة احتمالنا مش واحدة
ذكاءنا النفسي والاجتماعي مش واحد
الكيمياء العضوية الي في مخنا والكهرباء والهرمونات والمستقبلات العصبية مش واحدة
الغلط بنقول عليه غلط على اساس سياق المشاعر والخبرة والسن وكل حاجة
القتل شيئ كريه جدا
لو واحد مختل عقليا قتل .. القتل هيفضل شئ قميئ جدا جدا
بس الشخص مكانش في وعيه ..
وبعد بدأه لعلاج نفسي دوائي او جلسات كهرباء
بقى شايف زينا ان القتل قمئ جدااااا
اعراض المرض النفسي غير واضحة للمجتمع عموما
ازاي ممكن شخص طبيعي يرتاح لما يجرح نفسه او يشوه جسمه
او ياخد مخدر يغيّب وعيه او يرتاح لما يضرب كلب في الشارع او يأذيه
احنا كجيل في الثلاثينات مكناش قدوة للي بعدنا، واستخدمنا السرعة والتكنولوچيا بشكل متخلف جدا
بدل ما اهتم بصحتي النفسية والاجتماعية واطور مهاراتي في التعامل مع صعوبة الحياة
اخترعنا عروسة او دمية تقدر تختار مواصفاتها وشكلها وتعيش معاها كشريكة لحياتك بدل ما نهتم بالفجوة الرهيبة في التواصل بيننا
اخترعنا ريبليكا للشخص الي فقدناه بدل ما نتعلم نواجه وجعنا ونعدي بتجربة الفقد
طلعنا المريخ علشان نعمل كوكب جديد بدل ما ننشر وعي كفاية ان كوكب الأرض بينهار واننا مش عايشين عليه لوحدنا
اتعلمنا نشات بدل ما نتكلم مع بعض
اتعلمنا نعمل بلوك بدل ما نتقبل الآخر ونتقبل وجهة نظره المختلفة
العقل اللي اخترع الذكاء الاصطناعي، عجز عن حماية الأطفال من التحرش
مواليد الثمانينات والسبعينات اتصرفوا مع معطياتهم بشكل مزق الاوطان والمجتمعات والعائلات والكائنات التانية الي بنتجاهل وجودها
يعني ايه اروح ل فيل في بيئته الطبيعية واكسر العاج الي في وجهه علشان افتخر ان المشط بتاعي او العقد الي لابساه من العاج الطبيعي بدل ما افتخر بنفسي .. ازاي بقى العقد الي اتصنع من ألم ومعاناة الفيل، اغلى مني علشان ابقى انسان من الطبقة الي فوق بدل ما اثقف نفسي واهتم بمعتقداتي وتصرفاتي
للأسف كل ده اتردلنا دلوقتي في اولادنا واخواتنا الصغيرين
وبنهاجمهم ونعاقبهم ونرفض وجودهم مع إنهم نتيجتنا المباشرة
