نظرية مبدئية عن تكاثر المشاعر

 

لو كانت للمشاعر طرق للتكاثر كالكائنات

لوجدنا أن الخوف ينقسم ذاتياً وينتشر في خلال أيام

أما الألم فيحبل ويلد حزناً ينمو بضع أعوام في كنف الألم حتى يصبح بدوره ألم ناضج مستقل

هذا عكس الحب الذي ينمو بالبناء الضوئي، بذرة صغيرة + الظروف المناسبة + الوقت المطلوب ليبدأ في إنتاج البرراعم تلقائياً

و سنجد أن الضجر يبيض .. نعم يبيض ويرقد على بيضه حتى يفقس البيض ثم يعيد الكرة .. ولا شئ يبيض مثل الضجر

الغضب يزيد في الحجم فقط وليس في العدد، لا تستطيع ان تسمي هذا تكاثرا

أما الفرح فلا يلد من تلقاء نفسه ولا يستطيع التكاثر ذاتياً وكذلك ليس للظروف أو الوقت دور حقيقي هنا .. يبحث الفرح عن شريك حياة لإتمام عملية التكاثر ويتعزر عليه الإنجاب بدونه

The meaning of being lonely

بما إن عدد البشر عالكوكب في انخفاض مستمر، ومافيش وسيلة الناس تقرب بيها من بعض

التكنولوچيا -كالعادة- بتتدخل لحل كل مشاكلنا كبشر

الاختراع ده هيغنيك عن احتياجك للنوم في حضن حد

اه والله

علشان تعرف تتفرغ لحياتك العملية والمادية وتتخلص من الاحتياجات العاطفية والاجتماعية اللي بتعطلك عن انك تكون شخص سوي

سوي مين بقى، كل سنة وانت طيب 

المهم دلوقتي تنزل الشغل علشان البتاع ده غالي شوية وانت محتاج تشتريه

مش عارفة كنا عايشين ازاي منغير تكنولوچيا

غالباً كنا بننام في حضن بعض !!!

البشرية كلها محتاجة تقف شوية وتشوف المشكلة فين، ليه بقى من الصعب جداٌ نعمل علاقات سويّة مع بعض؟

سواء زملا او اصحاب او حبايب

يثير غثياني هذا التردّي الذي بلغناه

يوجد شرخ واضح في آدميتنا بيزداد اتساعاً بسرعة لدرجة إننا قد لا نستطيع تداركة

استهلكنا كل مواردنا بلا حدود، وكل موارد الكائنات التانية اللي معانا عالكوكب البائس ده، علشان نوصل لإيه؟ لإنسان يعرف يطلع القمر ويزرع عالمريخ بس مش عارف يعمل علاقة سويّة مع أي أنثى من نوعه على الأرض وكالعادة -تاني- التكنولوچيا بتتدخل علشان تلاقي حلول لكل مشاكله واخترعتله عروسة جنسية تُحاكي الواقع لدرجة متفرٌقهاش عن اي أنثى انسان حقيقية

المشكلة اعتقد بدأت في حدود 1966 لما كنا بنتسائل

Where do all the lonely people come from?

في 1999 كنا خلاص اتعودنا وبقينا بنجاري اللي بيحصل وبنقول بيأس

Show me the meaning of being lonely

دي العروسة عشان لو مش فاهم علاقة الصورة بالكلام 😁

مقدمة مختصرة في عِلم "إيه اللي وصّلنا كدة"

 

إنسان بدائي 1 : انا مضغوط نفسي في تفاحة حلوة منغير مجهود

إنسان بدائي 2 : عندي طلبك، خد التفاحة دي ب 10 جنيه

إنسان بدائي 1 : طعمها مش حلو قوي .. في أنواع تاني؟

عندي تفاح كبير ومسكّر ب 20 بدل 10 حاجة كدة معدّلة چينياً بشكل يناسب ذوقك والضغط النفسي اللي عليك

إنسان بدائي 1 : لسة مش حاسس اني متدلع كفاية بالنسبة للضغط اللي بواجهه يومياً، ممكن تقطّعهالي؟

إنسان بدائي 2 : ممكن اقطعهالك ب 20 جنيه تاني وممكن اعملهالك عصير ب 30

إنسان بدائي 1 : عصير فكرة حلوة جداً بس خايف اهطّل على نفسي وانا قاعد مأنتخ كدة

إنسان بدائي 2 : نخليهم 80 على بعض وهجيبلك العصير بشاليموه في كباية ديسبوزابل عشان تشرب منغير ما تتحرك خالص ولما تخلّص ارميه جنبك وانا هبعت حد يلم وراك

إنسان بدائي 1 : موافق، خد 80 جنيه

إنسان بدائي 1 ياخد العصير ويبدأ يشربه لكن تبدو عليه علامات الامتعاض

إنسان بدائي 1 : انا اتدحك عليا، الفلوس اللي دفعتها اكتر من الريوورد اللي انا حاسه بكتييير

إنسان بدائي 2 : طب زود 20 كمان وهحطلك سكر وألوان ومُكسبات طعم وريحة تخلي الريوورد سيستم في نفوخك ينوّر

إنسان بدائي 1: طب خد 100 ... بقوللك بالمرة، عندك لبن مبيفورش وبطيخ منغير بذر ؟

بعد فترة إنسان بدائي 1 يتعب والدكتور البدائي يقوله يبعد عن الأكل المصنّع وياكل طبيعي

يتوجه إنسان بدائي 1 لإنسان بدائي 2 ويسأله عن التفاحة اللي طعمها وحش اللي كان هيبيعهاله في الأول ب 10 جنيه

إنسان بدائي 2 يطلّع التفاحة المعدّلة جينياً اللي كانت ب 20 جنيه ويقوله : عندي تفاحة أورجانيك طبيعي 100% كل الدكاترة دلوقتي بتنصح بيها بس دي ب 120 جنيه علشان صحية غير مواد حافظة والكلام المضّر بالصحة ده