لكل رُكن في قلبه يحكيلك حكاية

If life worth living

People worth life giving
quoted by me

ركن رقم 1 (بيقولوا الأصل قرد)
البلكونة الكبيرة اللي في بيتنا, قافلين الشيش علينا من برة بشماعة, أكبر واحد فينا عنده 11 سنة مثلاً بس عاملين جبهة معارضة, مش فاكرة على ايه بس أهي معارضة و خلاص, حاطين لعبة من الي بيطلعوا صوت عالأرض عند باب الأوضة علشان لو حد داس عليها نعرف ان في حد جاي و نستعد .. لإيه بالظبط برضه معرفش
ماما واقفة جوة و بتزعق
-هتتفقوا عليا !! طيب أنا قاعدة هنا مستنياكم تطلعوا

ركن رقم 2 (اللي لسة واحشاني)
أولى ثاناوي
في شارع جانبي قريب من مدرسة الفراعنة, جمب عربية مدرس العربي بتاعنا "مش فاكرة اسمه"
هي بتراقب وانا بحاول أفتح العربية ببنسا أو بمطوة أو بكل حاجة معايا
متوقعين نلاقي أوراق مهمة هتودي حد معين في داهية أو هتحرر اسكندرية و نستقل بيها أو هتخلي مدرس الانجليزي "محمود صبري" يسحب استقالته .. و عينها على صاحب السوبر ماركت الي بيبص علينا تقولي
-عارفة حاجة !! كويس انك مطلعتيش ولد زي ما كان نفسك, مكناش هنبقى أصحاب .. ده غير انك كنتي هتقضّي نص عمرك في السجن .. وانا بصراحة مش هلاقي أصحاب زيك بعد كدة

ركن رقم 3 (اللي حبّوني)
شارع لؤلؤة الطائي في الأزاريطة, شهر 11 معاد لعبة سيكرِت سانتا زي كل سنة, طرطور بابا نويل فيه أسامي الدفعة كلها و كل واحد بيمد ايده ياخد اسم .. بعد 6 سنين محدش عمره عرف ان كل واحد بياخد اسم من لستة أسامي انا عايزاه يختار منها علشان اعرّفهم على بعض أكتر ولا حد عرف اني بكون شايلة الأسم الي هاخده من بليل مش بختار زيهم
-ممكن تبدليلي الأسم ده
-طبعاً ممكن هو انت أي حد أنت بس تُأمر "و دي كانت الاجابة الي بقولها لأي حد"

ركن رقم 4 (إلي حبّني منغير شروط)
 خلوة الخدمة في فيلا الكنيسة الي في كينج مريوط
واقفة أعمل شاي بلبن و هو جه يغلس من ورايا
- لو سمحتي يا تاسوني أغسلي المعلقة من اللبن بعد ما تستعمليها علشان تسيبيها نضيفة للي بعدك
أبص ألاقيه هو فيقول
- بهزر طبعاً انتي عارفة, سيبيها وانا هاغسلها
 
ركن رقم 5 (اللي معرفتوش)
مارس 2006
حوش مارجرجس سبورتنج
اسبوع الآلام, بعد البصخة بتاعة الصبح
واقف قصادي و قاعد يرن على نمرتي الي اديتهاله امبارح في الشات  و انا شايفاه و سايبة الموبايل في جيبي
مستني يشوف مين هتمسك موبايلها لما يرن عالنمرة, متراهنين انه هيعرفني .. يروح يكلم واحدة تانية موبايلها رن بالصدفة في نفس الوقت فاضحك انا و اطلع من الباب الي ورا و اكلمه فيقولي
-ده مستحيل انا استسلمت خلاص .. انا الي هجيب الشوكلاتة

ركن رقم 6 (اللي مخبية الجناحات تحت هدومها) 
كلية طب جامعة اسكندرية, الطرقة الي بين المشرحة الجديدة والقديمة "قبل ما يتهدوا"
انا و هي معانا ورق و كتب صغيرة للهدايا, عمري ما كنت معاها و مكناش بنعمل حاجة تفرّح حد تاني .. بس النِيّة لوحدها مش كفاية
-دول هدايا أعياد الميلاد الشهر ده, الشهر الجاي هجيب حاجة تانية علشان ميزهقوشأبص عالكتب ألاقيهم (الشباب والادمان, الشباب والبطالة, الشباب وأي عفريت أزرق..... ) يخرب بيت الحشيش :D , و آخدها و ناكل بيتزا في تافرنا 

ركن رقم 7 (المكتأب بأمر الله)
عندنا مراجعة تشريح, بس أنا وهو قاعدين على السلم الي جوة المتحف الي كان في المشرحة الي اتهدت
قاعد يحكيلي رواية بيكتبها عن السحر أيام الفراعنة ومقتنع جداً بالفكرة
وانا عايزة أروح أقف مع باقي الناس, سألني إن كنت زهقانة قلتله لأ علشان مكسفوش
- تصدقي انتي الوحيدة الي بترفعي معنوياتي باقي الناس بتزهق مني

ركن رقم 8 (اللي رِجِع في كلامه)
رووف العدرا سموحة
صيام الميلاد, بناكل فول و فلافل و بشرحله مايكرو ليلة الامتحان علشان مش عارف يذاكر
اول ما جينا سحبلي الكرسي علشان اقعد
-صعب قوي الواحد يلاقي واحدة واضحة قوي في مشاعرها كده .. انتي هتفضلي اختي على طول أنا عمري ما هغير ده

ركن رقم 9 (اللي بوظتهم)
مدرج التشريح في نفس الكلية "كان فوق المشرحة والمشرحة قلنا انها اتهدت فوق فيبقى اتهد هو كمان"
شايلة اكياس مليانة أكل و طالعة للدفعة الجديدة عندهم 4 محاضرات ورا بعض, عارفة ان ده صعب قوي, وعارفة ان الناس في أولى بتحضر كل حاجة, مش عايزاهم يحسوا انهم لوحدهم زي ما حسيت وانا في أولى, جبتلهم سندوتشات و عصير و وديتهالهم عالمدرج علشان لو حد بيفكر يروّح يفضل قاعد
-هو انتي ازاي كده !! ربنا يخليكي لينا

ركن رقم 10 (القَذِر)
الكرسي الخشب اللي قصاد مبنى الفيسيولوجي لنفس الكلية "و قبل ما يتهد برضه"
كارتون ملون, جلتر, مقص و لزق و حاجات كده كتير بنعمل بيها هدية لواحد تالت صاحبنا
شنطة عالأرض فيها علبة شوكلاتة بالويسكي
-هي دي العلبة اياها؟ لازم تخلص النهاردة .. انتي دماغِك خفيفة قوي, معاكي بطاقتك ولا هنروح في داهية !!

ركن رقم 11 (اللي فِضِل زعلان)
الصبح في معاد الكلية, ناصية شارع اسكندراني محرم بيه
اتخانقنا امبارح و زعل جامد .. كلمته:
-أنا تحت بيتك انزلّي
يجي بسرعة و نمشي ناحية محطة مصر
-انتي مجنونة, الناس هنا ميفهموش يعني ايه أصحاب .. كل ده علشان تصالحيني !! أنا مش زعلان خلاص

ركن رقم 12 (اللي لسة بتحاول)
شارع لؤلؤة الطائي تاني, زحمة طول النهار. بس ده الشارع بتاعي فـ بستنى لحد ما ألاقيه فضي و أمشي .. لسة في ناس مروّحتش
تيجي بعصير الجوافة بتاعها تقف جمبي و تديني شوكلاتة و تجر شكلي و تحكيلي عن مشكلة عندها علشان تاخد رأيي .. استغرب أنا قوي ان يبان عليا انفع في النصايح .. نتكلم .. و قبل ما تمشي تقولي
-شكلي لازم أعمل كده فعلاً .. انا مبسوطة اني اتكلمت معاكي, انتي عظيمة

ركن رقم 13 (اللي حللني)
آخر السنة الدراسية 2010 زوغت من نص الكورس
أنا وهو في مكان فخم قوي هو لسة راجع من برة و معاه فلوس بيتبسط لما يبعزقها .. قدامنا حاجات عجيبة أول مرة أشوفها و مش عارفة استخدامها و كالعادة الفضول بيقتلني
يجي الجارسون يلاقيني بلعب فيخطف هو الحاجة من ايدي و يطلب اتنين عصير فراولة و يفضل يتكلم كلام فلسفي ميهمنيش .. أي حد عارفني هيعرف اني هاكون مركزة مع حتت الفراولة الي مش راضية تعدّي من الشاليمو أكتر من الكلام الي عمري ما بفهمه ده, أنا مبحبش أعرف حاجة عن اي حاجة متهمنيش, و مبسوطة كده قوي
-انتي فاهمة أنا بتكلم في إيه !!
-ثانية واحدة, ثانية واحدة .. هي الجملة الي فاتت دي جايبها من كتاب ولا دي من دماغك
يبصلي بغباء
و أفضل أضحك لحد ما ييأس هو و يطلب الحساب و ياخدني عُمر الخيام علشان مفضحوش

ركن رقم 14 (اللي بيلاقيني دايماً)
كواليس مسرح مارمينا فلمنج, بعمل مكياج أراجوز على جمب و سامعاه بيديهم التعليمات جمبي, و يقرب
-إعملي البلطجية الأول
يسيبني و يقرب من المسرح, يتكلم و يشاور .. برطمان عسل برجلين البني آدم ده,
بيضحكني بأقل مجهود, التفاتة منه وسط شَدّة الشغل بتخلينا نكمّل مبسوطين حتى لو الشغل مش عاجبه, وجوده بيمشي الشغل حلو منغير حاجة و بيطمّن الكل ان تعبهم مش هيروح عالفاضي, موهوب في كل حاجة ليها علاقة بالمسرح و الأفلام
و موهوب في انه يكون "هنا"

ركن رقم 15 (اللي حبيتها)
أوضة في الدور التاني في مبنى الخدمات الي جنب المسرح, بنلون حاجات بالبوية بقالنا اسبوعين بنرسمهم
كل خمس دقايق نكلم حد يجيبلنا بيبسي و أكل من تحت, الشغل لمدة طويلة بيخلينا نهيّس
بدون مقدمات أحس اني عايزة لونها يكون مختلف شوية .. أخضر مثلاً
طبعاً لونها الأصلي عاجبها أكتر فتزعق
-ايه ده !! انتي مجنونة !! البتاع ده مبيطلعش والحفلة بكرة .. آه انتي عايزة تأثيري عالشباب يروح, ده بُعدك, أنا هاجي بفستان قصير من تحت و شفاف من فوق
و نضحك بطريقة تخلي الي معدّي برة يدخّل راسه من الباب و يقول
-هو انتوا بتعملوا ايه جوة !!! 

ركن رقم 16 (اللي حللته)
أوضة عالشمال في مبنى الجراحة لنفس ذات الكلية, مكان الدرس .. دِكّة خشب و شنطتين مفتوحين واحدة مرمية تحت الكرسي والتانية مكبوبة عالأرض و محدش بيلمها و في ديوان شِعر في ايدي و قلم في ايده
و ناس في كل حتة و دكتور بيقول كلام مهم جدا قدام و انا وهو قاعدين في نص الأوضة بنقرا حاجة و نتكلم و نضحك و كل شوية أدخّل ورقة في ودن اللي قاعد قدامنا فالضِحك يزيد و اللي حوالينا ياخدوا بالهم فـنوطي تحت و مرة واحدة الدكتور يبصلي و يزعق
-دكتورة, وريني ايه الي في إيدك كده

ركن رقم 17 (اللي عديت عشانه الناحية التانية)
سيدي بشر 13 ديسمبر 2010
شارع البحر بس ناحية البلد مش عالكورنيش, عند نانا .. اسكندرية بتغرق, الدنيا بتشتي جامد قوي من الفجر, في نوة من امبارح, و الأنفاق مهدودة,  و الشوارع مقفولة
أول مرة شفته كان من شهر, كنت ماشية لقيت واحد صاحبي ماشي معاه عالرصيف التاني من الشارع, وكان المفروض أشاور من بعيد و أكمل مشي .. معرفش ازاي عديت الناحية التانية قال يعني عشان أسلّم
بعدها بشهر كنت عرفته و بنخرج مع بعض
عالبحر
صوت الموج بيكسر إزاز محل ورانا
الطريق واقف وكل حاجة متكسرة حتى العربيات و عواميد النور
لابسة كل الي في الدولاب و مش باين مني حاجة و هو لابس جاكت واحد بس و سألني ان كنت محتاجاه ولا لأ !!
الناحية التانية موجة تعلى لفوق قوي و تغرق ناحية الكورنيش كلها
يفرد دراعه و يقول
- ما تيجي نعدّي الناحية التانية
PS: عديت معاه الناحية التانية :D

ركن رقم 18 (اللي سافرعلشان يديني شوكلاتة)
5-3-2012
شارع سوتر, الطيباوي, الطرابيزات البلاستيك الي في الشارع
كبايتين شاي و ساندوتشات و جالاكسي بالبندق
و ملخّص لمادة 1000 صفحة في يجي 50 ورقة بس
عندي امتحان فاينال كمان كام يوم في نفس شهر عيد ميلادي, جه من المنيا علشان يديني شوكلاتة و يقولي
-تتغير كل حاجة و تفضلي انتي زي مانتي

ركن رقم 19 (الي سافر و لسة مرجعش)
أوضة 602 في المستشفى التعليمي
كنت محجوزة بقالي بتاع 11 يوم علشان كان عندي نزيف في المخ
ماكنتش باعرف أمشي لسة و هو جه يسأل عليا بالصدفة الدكتور قال هنجيبلها دكتور علاج طبيعي .. قال أبداً و دي تيجي .. وابتدى يطنطط عليا
- اعملولها تمارين للإتزان, ممكن مثلاً أخوها يوّقفها جمب الشباك ده و يزقها منه و يشوف هتقع ولا لأ

ركن رقم 20 (المسطول)
شارع زهران رشدي في جليم
الدور الخامس أو السادس تقريباً
طول السكة بيقنعني ان مامته فوق و ان أهله "بيس قوي" و اني لو طلعت معاه عادي .. من الآخر كده كل الجُمل الي بيقولها الراجل في أي فيلم عربي والهبلة  تصدقه و تطلع و تلاقي البيت فاضي
أنا هنا واخدة دور الهبلة فـطلعت, لجل دعا الوالدين مش كل كلام الأفلام صح و مامته كانت فوق فعلاً, قعدنا معاها شوية و دخلنا و قعدنا في بلكونة أوضته, طرابيزة و كراسي بلاستيك, قدامنا سندوتشات من هارديز و علبة مايونيز و معلقة و مكانش عنده بيبسي
-انتي أول مرة تجيلي, صح؟

ركن رقم 21 (الي متكلمش)
دفعتي كلها اتخرت وأنا لسة بذاكر
يادوب خلصت مذاكرة معاه في كافيتريا الكلية و زهقانة على الآخر فأخدني يفسحني علشان أروح أكمّل مذاكرة
راجعة البيت من عالبحر مشي وهو بيوصلني
كلب أسود كبير يعدي مع صاحبه من جمبنا فأنكمش لربع حجم الانسان الطبيعي و استخبى وراه لحد ما الكلب يعدي
يتكلم عن الجواز فأرد
- مش هينفع أظلم حد معايا أنا أصحابي الولاد كتير, مش هلاقي حد مايكونش عنده مانع يكلمني يلاقيني بتمشى مع واحد دفعتي عالبحر بعد ما خلصنا مذاكرة في الكلية و يبقى متطمن ان ده مجرد صاحبي مش أكتر
- هممممممم, معاكي

ركن رقم 22 (اللي رمتني من فوق)
أعلى مكان في العالم
أنا متنحة في السقف و هي متشقلبة على راسها و بتقول ان شكلها كده أحلى .. أفوق و أطلّع حتة تلج من الأيس كوفي أرميها في هدومها تصوت و تجري ورايا و تعضني و توقعني على الأرض
نضحك بصوت عالي قوي و نسمع صوت حد طالع من الأسانسير فنتكتم و تيجي تمشي فتتزحلق في حتة الفطيرة الي عالأرض من امبارح و نرجع نضحك بصوت أعلى .. و تقولي
-أنا فكرت امبارح و لقيت اني معنديش الأنهيدونيا الي قلتي عليها دي علشان لسة في حاجة بتبسطني .. الحاجة دي انتي

ركن رقم 23 (الي غَلَبوني)
ماكدونالز الشاطبي, طرابيزتين ملزوقين في بعض و يجي عشرين بنت في اعدادي قاعدين, كلام مش متعودين يسمعوه و حاجات عمرهم ما قالوها لحد وواحدة عندها 25 سنة بتقول رأيها في الولاد الي هما معجبين بيهم و بتتخانق معاهم على اللعبة بتاعة هابي ميل
-هو انتي هتتخرجي امتى؟ متسيبيناش تاني بقى

ركن رقم 24 (صاحبي الوحيد)
سما صافية قوي و شمس ساذجة بشعاع أصفر زي اللي العيال بيرسموها في كراريس الرسم في حضانة
الخلفية أغنية (بعيد عنك حياتي عذاب) لأم كلثوم داخل فيها أصوات ناس كتير واخدين دور السيطرة الأبوة وواقفين فوق نافوخنا يدوا تعليمات و توجيهات بس احنا مطنشين و بنلعب شِعر أنا و هو و مبسوطين دلوقتي, بغض النظر عن اننا هنفضل كده ولا لأ .. و يقولي
-انتي عارفة انِك صاحبتي الوحيدة, صح؟

ركن رقم 25 (اللي مش عارف يولع الكبريت)
في شارع عشوائي في محرم بك, الجو حر قوي, واقفين تحت شجرة بنولع سيجارته
ركبنا مشروع و بعدين ركبنا الترام من محطة مصر علشان نوصل لبيت واحدة صاحبتي هاخد منها ورق
من الصبح بيحاول يولع سجايره بالكبريت و مش عارف
و انا بساعده, أحط إيدي حوالين الكبريت علشان ميتطفيش .. و هو يولع في إيدي 
تتصل بيا هي تسألني: أنتم فين؟ فيقولّي
-قوليلها احنا تحت الشجرة

ركن رقم 26 (اللي قابلته)
كرسين خشب و طرابيزة خشب .. كبايتين شاي .. ديكور مش مناسب لعيادة, بحاول أتقمص دور دكتورة نفسية و برضه ملامحي مش مناسبة للشخصية
حاولت مغرقش .. و غرقت
نتكلم كتير قوي .. و احاول أكون دكتورة
و الاقي صاحِب .. فانسى :)
-عارفة, في حياتي كلها في 6 أيام أنا بعتبرهم أحلى 6 أيام في عمري .. النهاردة هعدّه رقم 7

ركن رقم 27 (اللي جاب الازازة)
11 نوفمبر 2012
طُرقة في قهوة بلدي .. طرابيزة خشب عليها سندوتش جبنة تركي و بايب و سجاير مارلبورو بيضه وولاعة واحدة
الطرقة شكلها أوسع من العادي .. الحيطان بتنبض
الأرض كلها عشب أخضر والجو لونه أزرق والحيطان بنفسجي
في ازازة في شنطته  وكبايات مطبخ صفرا بنخمس في الازازة وانا نفسي يتقطع في النص فيكمّل هو لوحده
-هو أنا مستاهلش أنك تسكري معايا؟

ركن رقم 28 (اللي مش عايش معانا)
شارع معرفش اسمه في منطقة معرفش اسمها ورا مستشفى ناريمان
رايحين التجارية بعد ما حضرنا مناقشة حالة مع دكتور علم نفس هناك 
شاور على مكان في جمب الشارع مش فاكرة شكلة
-شايفة المنظر, حاولي تستمتعي .. عمرك شفتي حتة زي دي في اسكندرية قبل كده
 لعلمِك .. شركة الميّة الي مش عاجباكي دي أثرية
بلاش طيب, خدي الشوكلاتاية دي بحبها .. تاكلي بلح؟

ركن رقم 29 (تيتو بتاع الإذاعة)
على ناصية شارع زحمة جداً في منطقة عامرة بالبشر والعربيات
نبص على عمارة و نحدد الهدف "بابها" و تبدأ المغامرة
نمشي ورا بعض و يدخل كل واحد لوحده من باب العمارة كأننا مش مع بعض و أهم حاجة واحنا داخلين ان محدش يعرف اننا طالعينله. و محدش ليه عندنا حاجة
عمارة قديمة من غير بواب بس الجيران مقرفين
نطلع الدور التالت و نخبط عالشقة
يفتحلنا هو و ترحب بينا ستيلا "الكلبة بتاعته"
بيقولوا المعرفة الي أولها اصطباحة بتبقى فُل
طيب بالنسبة لو أولها سُكر و عربدة نظامها إيه !!
نشرب مايستر تاني غير الي كنا شاربينه قبل ما نيجي
وانا مبسترش في المواقف الي زي دي
أضحك بصوت عالي فيقول
- الصوت يا جدعان الصووووووووووت

في أركان كتير مكتبتش عنها, و في ركن فيه المكنسة والزعافة والحاجات دي علشان ألمّ الرماد من الأركان الي اتحرقت و اشيل خيط العنكبوت من الأركان الي بطّل يدخلها نور
بس الي يعرفني برضه هيعرف اني مش بتاعة نضافة, و الاركان زي ما هي تقريباً من ساعة آخر حريقة حصلت هنا

يا ناس يا عبط يا عشمانين
في فرصة تانية للقى... بطلوا أوهام بقى
وكفاية احلام واسمعوا
عيشوا بزمّة وودعوا كل حاجة بتعملوها وكل حد بتشوفوه
عيشو المشاهد كل مشهد زي ما يكون الاخير
اشبعو ساعة الوداع واحضنو الحاجة بضمير

مصطفى ابراهيم