بعض الجرذان يعطون لأنفسهم الحق أن يقتحموا أى بروفايل لأنه اعجبهم أو فلنقل استفزهم بالدرجة الكافية, تلك المخلوقات أصبح فى منهم فى كل حتة و من كل نوع
هناك مثلا من يعتقد اننى حمقاء أو أن مكتوب فى بروفايلى من برة انى بكلم الناس الهبلة فيبعت يقوللى:
ازي حضرتك انا بجد اسف على طريقتي بس والله العظيم انا معجب بحضرتك جدا ونفسي اتعرف عليكي وتعرفيني واعرفك, وربنا يكرمنا ويحصل بينا نصيب وقبول يارب وعارف انك مستغربة بس بجد انا كل اللي عاوزه منك انك تديني بس فرصة مش اكتر. وانا عاوز اتقدملك ونتخطب ان شاء الله, مستنى رد حضرتك
حضرتـــك !!! هأأو .. عبيطة أنا يا حسين
هأقوله لأ مستغربة ازاى دى حاجة عادية جدا بتحصل كل يوم ده فى خمسة تانى اتعرفت عليهم بنفس الطريقة بس للأسف محصلش نصيب و يارب يحصل بينا نصيب ان شاء الله
واكلمه كل يوم بليل وافضل سهرانة قدام صورة بروفايله واجيب وردة حمرة أقطع ورقها حصل قبول .. محصلش
وهناك نوع أخر وهذا يعتقد اننى بتاعة الكلام ده ودكها و أى كلام يجى فى سكتى فيقول:
هاى انا اسمى ايهاب رامى توفيق 38 سنة بشتغل مهندس من القاهرة اصلا لكن حاليا عايش ومقيم فى الغردقه من شهرين لان شغلى اتنقل هناك انا شوفت صورتك على الفيس بوك وبجد انتى اموره جدا ممكن اعرف اميلك ونبقى اصدقاء؟
من ساعة ما جيت هنا وانا هفرقع لانى اليوم كله اما فى الشغل او البيت بكلم نفسى لانى عايش هنا لوحدى او بلف بعربيتى فى الغردقة علشان احفظها او بدخل نت علشان الاقى حد اكلمه فلو حضرتك تحبى نتعرف ونكون اصدقاء ده شىء يسعدنى ويشرفنى ايميلى هو.............
أنا مليش أصدقاء هنا لسة وبعد ما بخلص شغل بفضل زهقان لحد بليل, بليز هنتظر منك الرد بموافقه او رافضه اوكى
وميرسى جدا
يا رووووحي .. أصدقاء, ايه العثل ده .. أنا بعيط من كتر تأثُري بالموقف
هيصعب عليا أنا بقى واحجز أول طيارة للغردقة, اروح أطبطب عليه وآخده من إيده, انزّله الشارع, أعرّفه على عمو البقال, واشتريله كورة كفر واعملّه اصحاب
والنبي يا خوانا لو في حد رايح الغردقة قريب يدور على واحد اسمه ايهاب رامى توفيق بيلف بعربيته في الشوارع يمكن يقدر ينقذة من الانحراف انتم عارفين الشباب في السن ده معرصين .. قصدي معرضين للإدمان :D
لكن ورغم كل هذا هناك آخرون لا استطيع ان اجزم هويتهم أو ماذا يريدون:
enti magnona 3alla fekra just joke .. dema3'ek 7elwa awi we moftakasa awi awi .. ana metabe3 a3malek 3alla fekra mn zman .. begad enti ezay keda ?!!! .. enti mesh momken begad .. enti dema3` begad eslobek to7fa we ra2e3 .. we tab3an bayen gedan en dammek 5afef .. ana mesh ba3akes 3alla fekra .. bas ana kan lazem abdi e3gabi be el eftekasat de .. we begad ana asef law kont motatafel 3aleki .. enti ra2e3a
ده زي أنا مش إخوان بس بحترمهم !! ما علينا, رديت بِـ شكراً .. وبعد كام يوم
ezayek ya (my name) .. ta taa taaa lol .. tab3an enti mesta3`raba ana 3ereft (my name) da ezay .. enti ya (my nick name) betet3amli ma3a a7`tar gehaz mo7`abarat 3alla mostawa el ke-razza .. 2oulili 3amalti eah fe emte7anatek ta2reban kan 3andek emte7an fe a5er 10 3amalti eah
إيـــه !!! ليــــــــــه؟؟؟ فعلا!!! ... طيــب
اذا كان الناس الي في اسكندرية هنا ميعرفوش أسمي الحقيقي و بينادوني بِـ 3 أسامي مختلفة ... و هو كاتب انه من القاهرة !!!
المفروض أرد عليه ازاي .. أقع من طولي و أنبهر بقى و كته !!!
ناهيكم عن نوع آخر من الرسائل عجزت كل كلماتى والكلمات البذيئة التي تعلمتها من صديقي عن وصف محتواها
داس اصحابها بأقدام متسخة على كل المبادئ والأخلاق التى يعترف بها أقل المستويات الآدمية فى العالم .. لن اكتب لكم أمثلة منعاً للإسفاف
علىّ الطلاق بالتلاتة مرة واحد بعتلي الرسالة دي ( أنا مش فاهم حاجة خالص من الي انتي كاتباه) .. واحد مافيش بيني و بينه أي حاجة كومن ولا جروب واحد حتى, و فضل يبعتلي انه مش فاهم الإنفو بتاعي لحد ما عملتله بلوك
ليه لما ألاقي رسالة من حد معرفوش مش بفتحها أساساً و لما أبعت رسالة لحد ميعرفنيش كويس بابقى عارفة أنه غالباً مش هيفتحها
ليه ممكن واحدة متحطش صورتها و تحط بدالها صورة جردل
ليه ممكن حد يفضّل يكون سيزيف بدل هويته الحقيقية و يعمل دي آكتيفاشن مثلاً
أو مش هكدب عليكم موضوع سيزيف ده ليه أبعاد تاني كتير تخلي الحياة أريح منغير فاس بوك .. و ده الأكثر سلبية
لازمته إيه بقى كل الهري ده عالصبح !!!
ولا حاجة
الكبت المصري أبو الأجنبي .. يلعن أبو الابتذال .. إبداع حقيقي في ابتذال العلاقات في وقت قياسي
احنا ابتذلنا كل شئ محتاجينه من أجل مجتمع سوي, العلاقات والحب والجنس .. احنا ابتذلنا الابتذال لحد ما بقى الكلام عنه مبتذل جداً D: D: D:
التواصل !!! ... في مليون طريقة أكثر دِفئاً و بتخلي الذكريات حيّة مش مجرد كام كوبي لرسالة أو برينت سكرين لكونفرساشن
الكلام بيوصل بين أي اتنين عن طريق 3 حاجات
7% الكلام الي بيتقال نفسه
38% طريقة الكلام و الصوت الي اتقال بيهم
55% حركة الجسم وقتها
ليه تاخد 7% لما ممكن تاخد الـ 100 كلهم أو على الأقل 45
عايز تكلم حد هتكلمه و مش هتلاقي ساعتها أعزار, مش عايز تكلمه يبقى اشتري دماغك, عايز تكلمه بس هو قافل على نفسه و عامل فيها حزين سيبه لحد ما يعرف ان الله حق و بينله أنك مهتم تشوفه و تسمع صوته لما يكون جاهز لده
أعمل مجهود في العلاقات الي تهمك و كفاية مزاولة لنفسك مع ناس متهمكش للدرجة
اعمل مجهود في انك تسجّل اللحظات الي تستاهل صور أو فيديو و تبعتهم للناس الي يهمك بجد تشاركهم كل ده, منغير بقى ما تنزّلهم للخمسميت friend و follower الي عندك و تستنى اللايكات كل نص ساعة و تقيّم من خلالها شكلك ووقفتك و ضحكتك و هدومك وبالتالي آدائك بعد كده هيختلف على حسب عدد اللايكات و تعاملك مع الناس هيختلف على حسب مين الي سابولك تعليقات لطيفة تحت الصور
عند 90% من البشر الفاس بوك بقى "بس" بيخدم مراقبة الناس أو على الجانب التاني التعبير عن النفس سواء المشاعر أو الآراء بشكل مُـجَـمَـد
كأنك بتاكل معلبات أو فراخ مجمدة بدل ما تشتري الحاجة طازة
خليك راجل كفاية أنك تعبر عن ده بصوتك .. و في المكان والوقت المفيد مش طول الوقت و في أي حتة و مع كل الناس
استخدم نباهتك المحدودة في إنك تعرف البشر من ملامحهم و انفعالاتهم مش من الاستاتيوسز الي عاملينلها لايك
سهل قوي تعرف البشر من اندفاعاتهم لو شغلت مخك شوية
بالذات لو في أي حاجة مختلفة في حياتك زي أن مايكونش عندك فاس بوك أو حاطط تاتو على دراعك
5 خطوات لتجنب تجميد حياتك
أعمل ديآكتيفاشن
أبزل مجهود في العلاقات الي يهمك تحافظ عليها و خلي ذكرياتك حيّة
وفّر المجهود المفقود وسط الزحمة
اتعامل مع البشر من خلال أجسامهم و ملامحهم مش من خلال بروفايلاتهم
خليك راجل و متخافش تعبّر عن نفسك أو تسأل حد عن مشاعره أو رأيه وجهاً لوجه .. أشرب بيرل يا جدع مش غالية D:
ليست هناك تعليقات:
إرسال تعليق