في محاولة لإقناع من يقللون من شأن كتاباتهم

الشِعر قمّة الابتذال جنب الوجع
والكلمة طِبّ عجز قدام حالة نزيف
والسهم بعد غرسه معادلوش مُرتجع
والكلام ع الجرح أصلا ً شئ سخيف
رامي وفا 

إذا لم تستطع أن تكونَ مُدْهشاً .. غإيَّك
أن تتحرَّش بورقة الكتابة
نزار قباني
متفقين ان الواحد بيكتب علشان يطلّع الي جواه مش علشان ينشر والناس تسقفله؟
لو متفقين .. هنتكلم من المنطلق ده
لو حاولت أوصِف إحساس حد تانى بإسلوبى هتطلع أضعف من كلامه كتير و أهبل كتير و أوحش كتير
علشان الى بيحكم هنا الإحساس مش اللغة
صحيح فى ناس متمكنة من اللغة أكتر من التانية و من كتر ما اتعودوا يعاندوها ألفاظها بقت بتطاوعهم .. في ناس بتعجن الكلمات بالظبط على شكل الاحساس الي عايزين يكتبوه
اللغة نفسها بتبقى عاجزة عن وصف مشاعرنا فى مواقف و مش بنلاقى كلام يكتب نفس المشاعر الى حسيناها بيها
علشان كدة الى بيحكم بين الركاكة والتكلّف فى الكلام هو الإحساس و صدق التجربة الشعورية و مدى تأثيرها في الى بيكتب
كل ما كانت التجربة أقوى أو الي بيكتب أضعف كل ما كان كلامه واصل للى بيقرى أكتر
يمكن علشان كدة تلاقى أكتر حاجات بتعجبنا الى بتكون مكتوبه فى أضعف أوقات للكاتب بتاعها
لو كانت التجربة ضعيفة أو الى بيكتب أقوى منها هيحصل حاجة من اتنين
هيطلع كلامه متكلف
لو لأ هيطلع ركيك
و اللى هيحكم ساعتها تمكنه من اللغة و طواعيتها ليه
و فى الحالتين النتيجة سيئة
الركاكة ليها ناسها اللى مبيفهموش الكلام المتكلّف
والتكلف ليه ناسه اللى مبيستطعموش الكلام الركيك
علشان كده .. الإحساس و صدق التجربة هى اللغة الى بيفهمها الاتنين 
بول فاليري يقول: أوصيك بالدقة, لا بالوضوح
المبتدئين في الكتابة غالبا مشكلتهم انهم بيقيموا كتاباتهم بمدى وضوحها
فبيوصفوا كتير و يشبهوا كتير و لأن تجربة كل انسان فريدة جداً في مشاعرها عن اي انسان تاني فعمره ما هيعرف يوصل للوضوح التام .. و يبص يلاقي نفسه كتب كلام كتير مش عايزه
في حين ممكن يكتب كلمة واحدة دقيقة جداً هو حاسسها بطريقة و كل واحد هيحسها بطريقة و في كتير مش هيفهموا حاجة
لا تكثر الايضاح فتُفسِد روعة الفن .. فيكتور هوجو
معلومة كده تتطبق على كل حاجة .. الشغف ناحية الحاجة بيقل لما تبتدي تشوف تفاصيلها .. علشان كده الغموض مغري
الشهوة تحجب التفاصيل, إذا رأيت التفاصيل فقدت الشهوة "علاء الأسواني"
الإبداع فى الكتابة ممكن يتشابه أو حتى يتكرر .. التجربة والشعور صعب صعب صعــــــب .. علشان كدة أصدق و أقرب و علشان كده كل جملة هيبقى ليها الى مش قادر ينزل عينه من عليها حتى لو كانت ضعيفة في اسلوبها 
متجاملش القارء على حساب اختزال جزء من مشاعرك أو غضبك .. ده الي بيفرق بين كتابتاك و كتابة أي حد تاني .. صدق المشاعر