كريم ده إبن أم أحمد الوسطاني
و إشمعنى أم أحمد
كده و خلاص يا جدع اسمع وانت ساكت
يمكن علشان بتقول على الحوض الكلوي, حوض قلوي
و عالعُطلة الرسمية, عَطَلة رسمية
و عالـ vital signs , فَرتَلة
أو علشان أي حد يقولك أن خلفة البنات في البلد دي صعبة ماعدا أم أحمد تقول خلفة الولاد أصعب
تقولي "البنت مطرح ما تحطيها تتحط و تقفلي عليها خلاص مش هتتحرك من مكانها"
إنما الولد متعرفيش تقفلي عليه
أم أحمد معندهاش بنات .. عندها 4 "صبيان" سابهملها جوزها (الله يرحمه و يسامحه) تربيهم لوحدها, بتخاف عليهم و طول النهار معاهم على التليفون, خصوصاً كريم علشان لا خاطِب ولا متجوز
تبقى المستشفى مقلوبة حالات طالعة من العمليات و حالات داخلة و هي قاعدة على الكاونتر تشرب شاي و تكلم كريم تطمن عليه
قِلّة المسؤلية حلوة مافيش كلام
أم أحمد عندها virus C
بس عارفة أن اختراع الجيش ده هجص ماغولي
من ساعة ما الدعم اتلغى و هي بتيجي بـ 4 جنيه مواصلات و ترجع بـ زيهم
أم أحمد بطلت تيجي الشغل علشان مبقاش جايب همه
و نصرة الممرضة بقت هي الي بتشيل شغلها
هاحكيلكم عن نصرة المرة الجاية
ليست هناك تعليقات:
إرسال تعليق