عندي حكايات قليلة لما بيخلصوا باحكيهم لناس تانين
عمري ما كنت بنت كويسة بالنسبة لأهلي وللمجتمع هنا
مكررة، عاطفية بزيادة، متقلبة جدا، عارفة عايزة ايه وبمسك فيه
دايما متمردة .. ساعات لهدف التمرد بس
ماشية بليستة لكل قوانين العالم، باكسرهم واحد واحد
ولما العالم يكسرني .... بٓ
باعترف دلوقتي، اسوء احساس ممكن أي حد يحسه، هو الخوف
وانا خايفة تقريبا طول الوقت، وتقريبا بخاف من كل حاجة، الضلمة، المرتفعات، الأماكن الضيقة، الأماكن الواسعة زيادة
كابوس بيصحيني من قبل ما اعرف أنام
خوف إن مشاعره تخونني، يبطل يبقى عايز يشوفني، ينساني من كتر ما احنا مبنتقابلش
خوف إني مش أنثى كفاية، مش مستقرة نفسيا كفاية، مش ذكية أو عاقلة كفاية
اتعلمت ده زماااان جدا وانا طفلة
إني كبنت، عمري ما هابقى كفاية، إن الراجل ممكن يكون معاه أربعة، وبرضه مش كفاية
الحب علمني الخوف، قبله مكانش عندي حاجة أخسرها .. علمني اليأس
معرفتش ألم أكتر من الألم اللي بتحس بيه لما الحب يعلمك اليأس
كأن طفل بيعلمك الكراهية، أو كلب بيعلمك الغدر
أنا عارفة إن لازم أتجنب أي حاجة فيها مشاعر
زي ما مريض القلب بيتجنب طلوع السلم أو الأكل التقيل
باحرص دايما إني آخد صور تذكيرية دايماً .. أو تأكيدية الصراحة، ذاكرتي الملعونة بتخونني لأن عقلي طول الوقت بيحاول باستماتة يخليني أحب نفسي
باخد صور للأشخاص والمواقف بإستمرار
علشان دايما مخي بيحرجني قدام نفسي لما أكتشف كل مرة إني كنت متخيلة أن العلاقة اللي بيني وبين حد، أقوى من ما هي عليه فعلا في الحقيقة
ودي صِفة ملازمة لكل علاقاتي
فبرجع للصور علشان تأكدلي مشاعري
تأكدلي تبادلها مع مشاعر تانية
الخوف اني لما ارجع للصور تاني، الاقي الوشوش الي فيها فاضية، مافيهاش مشاعر ... وتطلع مشاعري كل ده كانت بتبادل نفسها
بخاف من التخلي
بخاف من التعلق
بخاف من احساس الوحدة
ومعرفش ازاي ممكن حد يخاف من حاجة بيعملها طول الوقت
إمتى ماكنتش وحيدة !؟
لحظات قليلة جدا جدا
الناس بتتبدل في حياتي زي المواسم، شديدة أو خفيفة، لازم هتنتهي
علاقاتي بكل أنواعها ليها تاريخ صلاحية بيزيد ويقل على حسب سوء الاستخدام
دراسة اتعملت عن متوسط طول العلاقة للأشخاص الي عندهم اضطراب الشخصية إللي عندي
متوسط عمر العلاقة سنة وست شهور
علاقاتي بتبدأ عنيفة في جمالها .. ملتهبة .. وبتنتهي بجفاف سريع، مفاجئ، تبريره الوحيد بالنسبالي وجود طاقة طرد متراكمة زي التراب فوق روحي
أول ما حاجة تصحيها وتحركها، التراب يتحرك ويبدأ في طرد الحياة الي دبت جوايا
وترجع روحي لركودها ويرجع التراب يتراكم عليها
مبقيتش اتفاجئ
بارجع اوضتي
أغير ترتيب ملامح وشي
اعمل فطار لشخصين .. آكله لوحدي
أرصّله حجر شيشة، أشربه لوحدي
البس البلوڤر الكحلي الكبير البهتان بتاع الشخص الوحيد اللي قال انه بيحبني
تحت القماش الخفيف .. جلدي، وجودي الغير ملحوظ، كياني المشوه، المضطرب، المعطوب، و روحي
روح عارية تماماً، منغير جسم أو جلد سليم يحميها
روح عريانة في مهب الريح، ورق الشجر والقش العالق في الهوا بيوجعها
علشان كدة دايما بلف روحي بشخصية واثقة من نفسها، متعرفش كسوف أو خوف، شخصية لما ببصلها مبشبهش عليها
خفة دمها المكررة مبقيتش تضحكني زي ما بتضحك الناس الي حواليها
عندها نكت محفوظة، وحكاياتها المسلية قليلة لما بيخلصوا .. بتحكيهم لناس تانيين
وأغطي روحي من جديد بالليل، والشوارع، والبرد
بلفها بالبلوڤر الكحلي الكبير البهتان بتاع الشخص الوحيد اللي قال انه بيحبني
ولما بنام بسيبله مكان جنبي .. يمكن يجي
ليست هناك تعليقات:
إرسال تعليق